Aħna nagħtu sessjonijiet ta’ taħriġ ta’ sagħtejn il-waħda fl-ambjent skolastiku stess li matulhom infissru l-ambitu tal-proġett u nfasslu strateġija skont il-bżonnijiet tal-iskola partikolari u skont ir-reazzjonijiet tal-istaff. Il-progress jiġi diskuss mal-iskola fuq bażi regolari u dan isir b’tali mod li ma jqegħidx piż bla ħtieġa fuq l-amministraturi jew fuq l-għalliema.

Flimkien ma’ waħda mill-iskejjel iddisinjajna powster li se jkun espost fil-klassijiet kollha biex ifakkar fl-importanza li jinxtorob l-ilma matul il-jum anke fil-klassi.

It-taħriġ juri l-importanza tal-ambjent skolastiku fl-iżvilupp ta’ stil ta’ ħajja san peress li t-tfal iqattgħu nofs ħinhom l-iskola. Għalhekk, waqt li l-edukazzjoni domestika hija kruċjali biex it-tfal jiżviluppaw valuri u prinċipji u drawwiet ta’ stil ta’ ħajja san, l-ambjent skolastiku jeħtieġ li jagħti l-appoġġ tiegħu billi t-tfal qegħdin iqattgħu f’dan l-ambjent ammont konsiderevoli mill-ħin li jagħmlu mqajmin.

Waqt it-taħriġ niddiskutu l-aħħar riċerka/dejta xjentifika minn pubblikazzjonijiet internazzjonali u lokali dwar ix-xejriet tal-obeżità u dwar modi kif tista’ tiġi evitata, b’enfasi fuq l-urġenza billi nuru statistika lokali. Barra minn hekk, niddiskutu l-aspett psikoloġiku u l-importanza tal-imġiba pożittiva u tal-irqad adegwat, kif ukoll l-importanza li jinbena sens ta’ komunità u solidarjetà bejn l-amministraturi, l-għalliema, il-ġenituri u t-tfal fl-iskola, ilkoll bil-għan waħdieni li l-obeżità tiġi destigmatizzata.

Sabiex isseħħ din il-bidla fl-ambjent skolastiku, ikun ideali li bejn il-lezzjonijiet ikun hemm waqfiet strutturati biex it-tfal jixorbu l-ilma u jiċċaqalqu. Interessanti li wieħed jinnota li xi għalliema diġà qegħdin jinkoraġġixxu dawn il-prattiċi u jipprovduhom fil-klassijiet tagħhom, waqt li oħrajn le. Permezz ta’ dan it-taħriġ l-għalliema jiltaqgħu u jaqsmu l-esperjenzi tagħhom mal-kollegi. Diskussjoni bħal din dwar qsim ta’ prattiċi tajbin tinkoraġġixxi oħrajn biex jagħmlu l-istess.

Fi tmiem is-sessjoni l-għalliema jiġu offruti eżamijiet tas-saħħa fuq bażi volontarja billi jagħtu donazzjoni volontarja. Huwa importanti wkoll li l-adulti jkunu konxji sewwa tal-importanza li jkunu f’saħħithom.

Nisa b’qadd ta’ iktar minn 80 ċm u rġiel b’qadd ta’ iktar minn 94 ċm li mill-bqija huma f’saħħithom (mingħajr dijabete jew problemi tal-qalb) huma mħeġġa jikkuntattjawna u jibbukkjaw eżami tas-saħħa abbażi ta’ donazzjoni volontarja.

• Li titnieda kampanja edukattiva fl-iskejjel, stratifikata skont l-età, li tenfasizza l-importanza ta’ stil ta’ ħajja san sabiex tiġi evitata l-obeżità u l-effetti tagħha.
• Li jiġu identifikati individwi  obeżi/b’piż żejjed (bl-użu tal-BMI u ċ-ċirkumferenza tal-qadd bħala kriterji) fil-kuntest ta’ spiżeriji fil-komunità, u li jitwettaq skrinjar tal-HbA1c u tal-profil tal-lipidi fil-post tal-kura bl-iskop ġenerali li individwi li jinsabu f’riskju u għadhom ma ġewx identifikati jiġu riferiti għall-kura medika.

Li titnieda kampanja edukattiva fl-iskejjel, stratifikata skont l-età, li tenfasizza l-importanza ta’ stil ta’ ħajja san sabiex tiġi evitata l-obeżità u l-effetti tagħha.

Li jiġu identifikati individwi  obeżi/b’piż żejjed (bl-użu tal-BMI u ċ-ċirkumferenza tal-qadd bħala kriterji) fil-kuntest ta’ spiżeriji fil-komunità, u li jitwettaq skrinjar tal-HbA1c u tal-profil tal-lipidi fil-post tal-kura bl-iskop ġenerali li individwi li jinsabu f’riskju u għadhom ma ġewx identifikati jiġu riferiti għall-kura medika. Għal aktar informazzjoni ikkuntatjana fuq info@behealthy.org.mt

Tfal f’saħħithom:

• Imorru aħjar akkademikament
• Ikollhom inqas problemi ta’ mġiba
• Ikollhom attitudnijiet pożittivi
• Jiksbu esperjenza fl-ikel (litteriżmu alimentari)
• Aktarx li jfallu inqas skola minħabba li jimirdu inqas.

L-immaġni ta’ hawn taħt dwar “6 Modi għal Stil ta’ Ħajja San” jiġbor fil-qosor l-elementi ewlenin kollha li aħna, ta’ adulti responsabbli, għandna nżommu f’moħħna sabiex inżommu lil uliedna u lilna nfusna b’saħħitna.

Tfal f’saħħithom għandhom bżonn:

Teħid adegwat ta’ ilma kuljum. Tfal fl-età tal-iskola primarja għandhom bżonn jixorbu 1.3 l ta’ ilma naturali kuljum.

Ikel nutrittiv u bbilanċjat tajjeb. Importanti li t-tfal jingħataw ikel nutrittiv għall-iskola sabiex jiżviluppaw drawwiet sani tal-ikel tul ħajjithom. Ikliet ibbilanċjati tajjeb jgħinu biex jitjiebu l-konċentrazzjoni, il-livelli tal-enerġija u l-motivazzjoni, u jitnaqqas ir-riskju tad-dijabete u tal-obeżità.

Irqad adegwat. Tfal fl-età ta’ bejn is-sitt snin u t-13-il sena jeħtieġu minn disa’ sa 11-il siegħa rqad. Il-ħin quddiem it-televixin ftit qabel l-irqad ġie assoċjat ma’ reżistenza biex it-tfal imorru jorqdu, diffikultà biex jiġihom in-ngħas, ansjetà fl-irqad u sigħat inqas ta’ rqad.

Attività fiżika adegwata. Mill-inqas hija rrakkomandata siegħa attività kuljum. Mhux bilfors tkun lezzjoni tal-edukazzjoni fiżika jew xi attività ekstrakurrikulari. Madankollu, importanti li żżomm lil uliedek attivi kemm jista’ jkun, ngħidu aħna, billi titlobhom jgħinuk fix-xogħol tad-dar, jew inkella permezz ta’ logħbiet divertenti fid-dar li huma aktarx fiżiċi milli sedentarji. B’dan il-mod jitnaqqas il-ħin li l-ulied iqattgħu jħarsu lejn skrin.

Dan il-proġett pilota jimmira li jsaħħaħ l-amministraturi u l-edukaturi fl-iskejjel biex irawmu bidla kulturali billi jinfluwenzaw il-politika fl-ambjent skolastiku f’dak li jirrigwarda d-drawwiet sani. Is-sistema Klikks għall-iskejjel u l-midja soċjali jistgħu jkunu pjattaforma biex jintlaħqu l-ġenituri. It-tfal iqattgħu nofs ħinhom l-iskola u n-nofs l-ieħor id-dar. L-edukazzjoni domestika fir-rigward tal-iżvilupp ta’ drawwiet tal-ikel sani tieħu prijorità. Għaldaqstant għandhom jiġu kkomunikati ideat qosra u prattiċi, kif ukoll tfakkiriet, lill-ġenituri dwar stil ta’ ħajja san. L-għalliema u l-ġenituri se jiġu offruti eżamijiet tas-saħħa fuq bażi volontarja billi jagħtu donazzjoni volontarja. Huwa importanti wkoll li l-adulti jkunu konxji sewwa tal-importanza li jkunu f’saħħithom.